රජයේ නිලධාරීන්ගේ වැඩ පමණක් කරණ රජයේ නිලධාරීන්

කිසියම් රාජ්‍ය ආයතනයක් බිහි කරනු ලබන්නේ බොහෝ විට යම් සේවාවක් ලබා දීම පිණිසය. නොඑසේනම් යම් නිෂ්පාදනයක් කිරීම සඳහායි. එහෙත් අද සෑම රාජ්‍ය ආයතනයකම මානව සම්පතින් සැලකිය යුතු ප්‍රමාණයක් වෙන් කිරීමට සිදුව ඇත්තේ ඒ ඒ ආයතනයේ සේවය කරනු ලබන ‘රාජ්‍ය සේවකයින්ගේ’ වැඩ කිරීම සඳහාය. එසේ සිදුව ඇත්තේ එම ආයතන ප්‍රධානීන්ගේ අවශ්‍යතාවයක් නිසා නොව; එසේ සිදු කිරීමේ වගකීම නීති රීති මගින්ම ඔවුන් වෙත පැවරී ඇති බැවිනි.

උදාහරණයක් ලෙස, දාහත්වන ආණ්ඩුක්‍රම සංශෝධනයේ ඇති ප්‍රතිපාදන අනුව, 2009 පෙබරවාරි මස 20 දින නිකුත් කරන ලද අංක 1589/30 දරන ගැසට් පත්‍රයේ පළ කළ ‘රාජ්‍ය සේවා කොමිෂන් සභා - කාර්ය පටිපාටික රීති’ සංග්‍රයේ XIX පරිච්ඡේදය සලකා බලමු.

‘රජයේ නිලධරයන් සම්බන්ධයෙන් ලේඛන හා වාර්තා සකස් කිරීම’ නම් වූ මෙම පරිච්ඡේදයේ රාජ්‍ය ආයතනයක ප්‍රධානියා විසින්, තම ආයතනයේ සේවය කරන නිලධාරීන් අරඹයා පවත්වාගෙන යා යුතු ලේඛන පිළිබඳව දක්වා තිබේ.

සපයා ඇති ‘පරිශිෂ්ඨ’ ප්‍රකාරව මෙම ලේඛන අඛණ්ඩව හා යාවත්කාලීනව පවත්වාගෙන යා යුතු බව එහි සඳහන්ව ඇත.

පවත්වාගෙන යාය යුතු ලේඛනය	පරිශිෂ්ඨ අංකය
1.     පත් කිරීම් හා උසස් කිරීම් සම්බන්ධ ලේඛනය	15
2.     සේවයෙන් පහ කළ නිලධරයන් සම්බන්ධ ලේඛනය	16
3.     සේවයෙන් ඉල්ලා අස් වූ නිලධරයන් සම්බන්ධ ලේඛනය	17
4.     තනතුරු අත හැර ගිය නිලධරයන් සම්බන්ධ ලේඛනය	18
5.     වැඩ තහනම් කර ඇති හා අනිවාර්ය නිවාඩු ගන්වා ඇති නිලධරයන් සම්බන්ධ ලේඛනය	19
6.     විශ්‍රාම ගන්වනු ලැබූ නිලධරයන් සම්බන්ධ ලේඛනය	20
7.     කාර්ය මණ්ඩලයේ වෙනස් වීම්  පිළිබඳව රාජ්‍ය සේවා කොමිෂන් සභාව වෙත අර්ධ වාර්ෂිකව සපයනු ලබන ලේඛනය	21
8.     සමස්ත කාර්ය මණ්ඩලය සම්බන්ධව පවත්වාගෙන යා යුතු ලේඛනය	22

ඉහත අංක 7 යටතේ දක්වා ඇති ‘කාර්ය මණ්ඩලයේ වෙනස් වීම්  පිළිබඳව රාජ්‍ය සේවා කොමිෂන් සභාව වෙත අර්ධ වාර්ෂිකව සපයනු ලබන ලේඛනය’ හෙවත් අංක 21 පරිශිෂ්ඨය යනු ඊට ඉහතින් දක්වා ඇති ලේඛනයන්ගේ සංඛ්‍යාත්මක සාරාංශයක් රාජ්‍ය සේවා කොමිෂන් සභාවේ ලේකම් වෙත අර්ධ වාර්ෂිකව, එනම් සෑම වසරකම ජූනි මස 30 දිනට හා දෙසැම්බර් මස 31 දිනට අදාල තොරතුරු දින 20ක් ගෙවී යන්නට ප්‍රථමයෙන් යැවීමට යොදා ගන්නා ලේඛනය වේ.

එසේම ඉහත අංක 8 යටතේ දක්වා ඇති ‘සමස්ත කාර්ය මණ්ඩලය සම්බන්ධව පවත්වාගෙන යා යුතු ලේඛනය’ යනු ආයතන ප්‍රධානියා විසින් තම විෂය පථයට ඇතුලත් වන සියලුම රජයේ නිලධරයන් සම්බන්ධව අඛණ්ඩව හා යාවත්කාලීනව පවත්වාගෙන යා යුතු ලේඛනයක් වේ.

මීට අමතරව ඒ ඒ සේවාවන් යටතේ ජ්‍යේෂ්ඨතා ලේඛනයක් ද පවත්වා ගෙන යා යුතුය.

නිලධාරීන් විසින් වාර්ෂිකව සම්පූර්ණ කර ඉදිරිපත් කරනු ලබන කාර්ය සාධන ඇගයීම් පත්‍රිකා භාර ගෙන අදාල පරිදි ඇගයීම් සිදු කිරීමද ආයතන ප්‍රධානියාගේ වගකීම වන්නේය.

මේ ආකාරයට ලේඛන පවත්වාගෙන යාම සඳහා සෑම ආයතනයක් සඳහාම, එම ආයතනයේ කාර්ය මණ්ඩලයේ ප්‍රමාණය අනුව නිලධරයන් කණ්ඩායමක් අනිවාර්යයෙන්ම වෙන් කළ යුතු වේ. ඔවුන් ‘රජයේ නිලධාරීන්ගේ වැඩ පමණක් කරන නිලධාරීන්’ ලෙස හැඳින් වූවාට වැරදි නැත.

එහෙත් වර්තමාන යුගයට ගැලපෙන පරිදි තොරතුරු හා සංන්නිවේදන තාක්‍ෂණය යොදා ගනිමින් එම කාර්යයන් සඳහා මධ්‍යගත පරිගණක පද්ධතියක් භාවිතා කරන්නේ නම්, ‍‘රජයේ නිලධාරීන්ගේ වැඩ පමණක් කරන නිලධාරීන්’ ද අදාල ආයතනයේ සැබෑ පරමාර්ථ හා අරමුණු ඉටු කර ගැනීම සඳහා යොදා ගත හැකි වනු ඇත.